長毛變短毛之後，噚日着短褲去立法會，襯番短毛look，點知惹來爭議，話說專搵全港走光黑點嘅民建聯潛水議員葛珮帆，開會期間突然質疑長毛着短褲唔莊重，違反《議事規則》，要求主席曾鈺成裁決。
八方唔知佢係咪驚長毛對「飛毛腿」被睇蝕，所以咁鬼「厚多士」啦，只知長毛為免之後開唔到會，匆匆換返條長褲再作戰，佢更一度暗示鼠王芬都衣着妖冶，但范國威卻話，妖冶都要有客觀條件，肯定激到鼠王芬紮紮跳！
指女議員亦穿露膝時裝
葛珮帆噚日開開吓會，突然聲稱有市民向佢投訴，質疑長毛「着短褲都得，第日係咪泳褲都得？唔着褲都得？」
葛珮帆要求主席曾鈺成裁決長毛違反《議事規則》，獲曾鈺成受理，要求長毛換返條長褲再入嚟，如果唔係就唔可以繼續開會。
長毛最初唔肯㗎，佢話香港人夏天最多人着嘅服飾，竟然被認定唔莊重，完全唔了解。
長毛又指，秘書處女職員同女議員開會都可以着露膝嘅時裝，「我身為男議員都應該可以」，仲叫葛珮帆搞掂自己個學歷問題先話佢。
但係考慮到未來幾日仲想開會作戰，長毛最終都係決定「忍辱負重」，換返條長褲再入會議室。
長毛變咗短毛，着短褲襯番個新look。
何柏佳
攝
點知俾人投訴，焗住要換番條長褲再開會。李展翹攝
佢重返會議廳就提出規程問題，指經民聯鼠王芬衣着唔莊重，曾鈺成表明唔認同；長毛其後仲不點名話有女議員打扮妖冶，着咗半截裙嘅鼠王芬聽到後，嬲爆對號入座，向主席曾鈺成投訴，並且要求長毛要收番「妖冶」一詞。
對號入座後遭范國威寸
點知不單止曾鈺成話無聽到長毛話邊個女議員打扮妖冶；新民主同盟嘅范國威更加「厚多士」，寸爆鼠王芬話：「妖冶係要有客觀條件，梁美芬議員唔需要過慮」。
李八方
沒有留言:
張貼留言