西裝玩Fusion 父子檔戰洋服界

http://hk.apple.nextmedia.com/news/art/20140204/18614673

正所謂「先敬羅衣後敬人」，拜年、公司春茗，為搶鏡亂晒行頭，只會淪為土豪。半途出家賣洋服的吳國泰﹝Joey﹞提醒，著衫最緊要「講信心，講style。」其實，男人四十才轉行，執起軟呎、大頭針，同樣要信心十足。「就係因為少人入行，無人做嘅嘢先要做。」

「呢 件我準備拜年著。」吳國泰﹝Joey﹞展示著一件大紅色暗花西裝，他沒有中年人的大肚腩，身上的西裝天天不同款，金、綠、紫、格子，全都敢披上身，活像一 個流動櫥窗，「師傅有時都問我『做乜執件咁嘅嘢返嚟』」事實上，Joey五年前才結束經營十多年的物流公司，半途出家造洋服。

他的店子躲在尖東一商場的地庫，明顯靠做熟客生意，物流與洋服，大纜都扯唔埋，「可能係遺傳掛！」Joey父親吳添，於尖沙嘴立足六十多年，擅長造燕尾服，於區內無人不曉，Joey從小於製衣工場打滾，幫手挑線頭，但卻從沒想過當接班人，「我覺得呢行好老！」

兜 了一個圈子，踏上老父走過的路，Joey決定將此夕陽工業年青化，教後生仔襯衫，「後生仔恤衫唔熨衫，白色恤衫唔著底衫，主要都係著黑同灰，或者韓風殺 到，個個都紅色格仔，但唔係個個都著得好睇。」年多前，從出口轉做本地生意，Joey偶爾被人客的奇怪要求弄得哭笑不得，「做完之後要加大兩個碼，好似買 衫畀細路仔咁，覺得第時會長高？」

目前，兒主外，父主內，Joey經常到大專院校當講座嘉賓，又參加不同商會擴展業務，老父添哥鎮守店 內。添哥已74歲，一輩子均為他人作嫁衣裳，剛開業時，新舊文化碰撞，擦出不少火藥味，「我做開出口，客人一定要準時，只有你等佢，無佢等你，人客12點 鐘嚟，你3點都唔見人，人哋都返咗祖家啦！」事實上，百足咁多爪的Joey，一根蠟燭兩頭燒，「我應承人5點交衫，4點幾身水身汗衝返嚟，佢都鬧，『衫十 點幾都擺咗喺度，做乜啱啱先返嚟攞？』」添哥對配件用料也絕不含糊，西褲拉鏈堅持用YKK，單是配件成本已過百元，「唔係金銀交易嘅問題。」

對於兒子半途出家，老人家絕不呵護，任其從跌碰中成長，「潮流興衫好窄，但普通人無可能著呢啲衫，做到咁窄，連放都無得放，成日要賠，要做過！你唔錯唔知，我預咗！」跌過碰過，老父對其專業的堅持，Joey也終於懂了。

無仇不成父子，爭執至最後，總以一句「唔撈！」作結，Joey不禁對記者大吐苦水，「佢試過丟底件衫走咗去，『你裁飽佢！』」「都係一兩句啫。」「嘩！係咩？」赤口已過，父子二人卻繼續吵個不亦樂乎，難怪添哥說「退休好悶呀！」