豪宅爆竊頻生 20隻奉命防賊 狗看更出租 身價貴過保安

http://hk.apple.nextmedia.com/news/art/20161011/19797265

豪宅爆竊頻生　20隻奉命防賊　
狗看更出租　身價貴過保安


剛成年的「工作狼」羅克學習撲咬，受訓成為狗看更。

【本報訊】在日韓，有出租寵物狗讓OL做「周末主人」；在香港，就有豪宅主人租德國大狼狗守屋，犬學堂創辦人鄧曄熙謂，豪宅獨立屋爆竊頻生，導致租用受訓警衞犬看門口需求殷切，過去3個月，學堂每日收到10至15個查詢，數字倍增，現已租出約20隻「工作狼」。這類狗界僱傭兵月租達1萬至1.6萬元，兼享專人照顧，身價待遇分分鐘更勝持牌保安員。
記者：呂麗嬋

走進位於元朗錦田水尾村的犬學堂，4隻身形巨大的工作狼未到當更時間，伏在籠內休息，見陌生的記者內進即狂吠，吠聲震耳欲聾。長年擔任漁護署犬隻訓練課程導師的鄧曄熙向記者派定心丸，「佢哋受過訓練，加上狗保衞嘅本性，我哋喺度，唔使驚，吠一陣就停」。訓狗專家擅長糾正寵物犬不良行為，但原來也有訓練工作犬。他指近半年豪宅爆竊案頻生，令租狗看門口需求殷切。

生病有替工頂更

根據警方最新資料，今年首8個月共有1,179宗住宅爆竊，較去年同期微跌6.9%，但包括中半山豪宅區的中區警區，收到的爆竊呈報較去年同期勁升72%，共有31宗。紀錄顯示，匯豐銀行亞太區副主席王冬勝位於山頂中峽道的「大班屋」，「富豪飯堂」福臨門七哥的山頂豪宅，亦先後遇劫。淺水灣道的獨立屋更一個月內三度被賊人光顧，包括鄭裕彤家族的豪宅以及賭王何鴻燊的四太梁安琪的獨立屋。

富豪大宅要加強保安，受嚴格訓練的護衞犬頓成新貴，鄧指「近排就多咗人搵受訓嘅成犬，講到明可以即時到位看門口，亦多咗好多人查詢租狗。住得呢類山頂豪宅，唔會冇錢買隻狼狗返屋企，但買狗要照顧佢生老病死，有啲人覺得租狗乾手淨腳，唔使照顧，隻狗唔舒服，我哋兩小時內要送隻健康狗過去，俗稱頂更」。犬學堂現時共有近30隻德國狼，其中三分二已租出，餘下的則住在犬舍有專人照顧，以備頂更。

鄧曄熙表示，租用工作狼，分月租包養和月租過夜巡邏兩種，前者收費約1萬元，後者約1.6萬元，「工作狼嘅性格穩定，警覺性高，狗嘅視覺同聽覺，夜晚會敏感一倍，有啲人唔想日頭隻狗留喺間屋，怕有狗味或者唔想特別搵個工人照顧隻狗，就要求日間放喺我哋狗舍代照顧，寧願畀多啲錢，每晚7點先送過去」。晚上由保安員拖着通宵行咇，或是放養在花園通宵執勤。

這類狗界僱傭兵，只有三餐一宿作酬，但租金身價，卻分分鐘高過一名以最低工資計算的持牌保安員。現時最低工資時薪32.5元，若以保安員一更每天工作12小時並返足6日計算，月入僅9,360元；就算按明年5月實施的新修訂最低工資34.5元計，月入同樣未能破萬，僅9,936元，相對月租包養警衞犬1萬元為少。鄧笑謂，一般人可能覺得萬多元租隻狗看門口很貴，但對於富貴人家，財物保障才是重中之重。

照顧人員需受訓


鄧拒透露顧客資料，表示有時更要簽保密協議，不能披露保安措施，「一般而言，我哋會先到租客住所實地視察，而負責照顧嘅工人或保安亦要接受培訓，學習發號施令及照顧等」。他又指「試過有啲豪門別墅，單個花園已經3至4萬呎，行一個圈已經好遠，只用一隻狗巡邏根本唔夠，我建議至少要兩至三隻」。另外，「狗更亭」的位置亦有學問，「背住個山嗰啲位最危險，通常喺嗰度放狗屋，但如果太曬又唔適宜，呢啲都真係要去到現場睇先得」。

http://hk.apple.nextmedia.com/news/art/20161011/19797271

出Show狗王值300萬


德國Show Line狼狗身價可逾300萬元。何家達攝

【本報訊】「工作狼」是指德國牧羊犬其中一個血系，常受訓作警衞犬，是比利時瑪蓮萊以外，最常用於保安的犬種。除了講究工作能力的工作狼，在電視或狗展常見到的，更多是俗稱「鐵包金」顏色兼樣靚的Show Line。身兼香港德國牧羊狗會副主席的鄧曄熙表示，出Show狗王身價高達300多萬元，在內地更矜貴，「Show Line身價咁高梗係唔會租，有乜事大家都麻煩」。

不少名人亦愛狼狗，如田北俊曾在面書上載摟着愛犬的合照，笑謂被太太埋怨「引狼入室」。據悉在張子強綁架富豪的年代，郭氏家族亦養了多隻受訓警衞狼狗看門口。鄧曄熙稱，德國狼身價視乎父母血統及體態質素，Show Line成犬一般10萬元起，着重工作能力的工作狼價錢稍低，幼犬與受訓成犬身價各異，人夾狗緣，價錢難一概而論。
■記者呂麗嬋

http://hk.apple.nextmedia.com/news/art/20161011/19797281

訓練有素　見疑人即撲噬



【本報訊】月租萬元的狼狗身價不低，自然訓練有素，13個月大的「工作狼」羅克，雖剛成年，但已百般武藝，一般如坐、隨行等服從動作駕輕就熟，身為準警衞犬的牠，亦受訓學習吠叫及撲咬等防衞護主動作，確保一旦遇上賊人時「做到嘢」。

曾誤當屋主路人甲

平時表現溫馴服從的羅克，見到穿上厚墊保護衣的「可疑人士」即狂吠，一秒間變成惡犬，待訓練員一鬆手，撲咬「獵物」，直至訓練員發出放口的指令，才鬆開口，企在一旁觀戰的記者，儘管有足夠心理準備，亦嚇了一跳。

鄧曄熙（圖）解釋，「我哋有時會夜晚訓練，穿上隱形衣，即厚墊保護衣唔係着喺面，而係着喺底，外面披件風衣，模擬現實情況」。富豪請警衞犬看門囗目標明確，不過鄧笑言屋主大多日理萬機，受僱的工作犬根本無見過僱主，好多時會誤以為老闆係路人甲，而無大無細，「狗唔同人，唔會知道邊個先係出錢請佢嗰個，試過屋主走出花園，隻狗狂吠，屋主唔熟狗性唔鍾意，但其實對狗嚟講，呢啲係自然反應」。

工作犬要執勤，生活有紀律，離開狗舍入住豪宅，會視照顧的工人或保安是主人，一般會跟隨工人6點半起床，由工人帶出去大小二便然後休息餵食，鄧稱「我哋會有10堂課教工人幫隻狗沖涼、剪指甲同清理耳仔等，早午晚3次散步」。夜晚是工作狼當更的黃金時間，通常由保安拖着行咇，「狗冇公眾假期放，但亦要定時休息，巡邏一個鐘休息半個鐘至一個鐘，梅花間竹，包月大宅過夜的工作狼，我哋一星期會有訓練員去睇一次，睇吓照顧成點同隻狗嘅狀態，畢竟租狗，有乜病痛我哋要負責」。
■記者呂麗嬋

http://hk.apple.nextmedia.com/news/art/20161011/19797294

專家：紅外線監察更實際


匯豐銀行副主席王冬勝位於山頂的「大班屋」早前遇竊，損失245萬元。資料圖片

【本報訊】豪門月花萬元租用警衞犬看門口，有人覺得物有所值，但負責屋苑保安工作的物業管理公司協會前會長梁進源，就認為「動物保安」有一定阻嚇性，但實際作用不大，「動物需時適應環境，又要有專人照顧，若保安人員本身流動性高，下下重新訓練，根本費時失事」。他認為加強保安系統，如在獨立屋或屋苑不同位置裝紅外線監察器，以及定期修訂保安員巡邏路線，保安效果更佳。

人狗行咇難普及


王冬勝

一人一狗的組合，造型滿分，但梁進源笑言姿勢多於實際，「好多香港人習慣屋企安個夾萬，貴重首飾及現金放喺屋企，成為被爆竊重大誘因」。他指香港治安不差，只因近月接連有名人的大宅遇劫，引起關注。「部份個案相信係有內鬼通風報信，令不法分子有機可乘」，他指有屋苑已安裝警報系統，遇門窗異常，即直接通報保安公司，確保在指定時間內趕到現場。

對於租用警衞犬，有業內人士同樣「唱淡」，指部份富豪要求每隔一段時間更換保安員，避免對大宅過於熟悉，「啲有錢人之可以咁有錢，係因為好難信人，啲工作狼係好醒，但始終跟定一個主人（保安），試過有旗下管理嘅多幢式豪宅屋苑引入警衞犬，但租咗幾個月就冇租，坦白講如果你住嗰度，左右都有人打劫，保安公司都要做啲嘢」。不同警犬執勤，該名業內人士又認為租用警衞犬，人狗行咇的組合，在私人保安市場難以普及。
■記者呂麗嬋