被CY激暈 婆婆怒斥「睇見佢就嬲」

http://hk.apple.nextmedia.com/news/art/20130208/18160157

獨居多年老無所依的郭嬌，稱只想政府多加關懷長者。
 

【記者王家文報道】郭嬌一暈成名。日前她出席工聯會團年飯宴，向特首梁振英訴苦，激動見暈，翌日登上報章頭條。這名72歲獨居長者，捱足一世，老無所依， 晚年經歷喪女之痛。她說回歸逾15年，生活越過越坎坷，三屆特首，最嬲梁振英，「講完一套又一套」，古稀之年，仍老馬有火，「個個都望佢落台，佢有乜嘢做 得出嚟？」

她有高血壓，兼患了感冒一個月尚未痊癒，但依然好中氣，說起長者苦況，越講越火滾。物價年年升，「貓魚都20、30蚊斤，買條菜都十幾 蚊斤」；輪候安老院也無了期。她申領綜援多年，扣除屋租和水電煤，每月捉襟見肘，「食腐乳就差唔多」。 

郭嬌日前與梁振英傾談時因情緒激動，身體不適。

 

團年飯當日，梁振英自誇政績，但郭嬌心水清，「我睇見啲老人仲慘過我，我見嗰個梁乜嘢英，講完一套又一套，講極都冇力，我咪出口囉」。梁臨走時，她趁機吐 苦水，「我話你（梁振英）講來講去都三幅被，為啲老人着想啦，醫療同福利邊度夠，有啲無兒無女，90幾歲好慘㗎」。梁只說了兩聲「好」，「冇反應答我就行 咯」。

為長者抱不平，郭嬌也自憐。五年前，患抑鬱症的孻女墮樓身亡，她記得當晚7時返家，見女兒伏在地上，幾近崩潰，至今憶起仍淚流。丈夫97年 去世，兩母女相依為命；女兒患病，失業多年，靠綜援過活，但很孝順，「有時會𠱁我，每個月頭攞到嗰啲錢（綜援），就會畀幾百蚊我」。白頭人送黑頭人，她 也患上抑鬱症。
 
郭嬌有四名兒子，關係疏離，上周跟兒子吃團年飯，「又如何？」她在漁民家庭長大，10歲做童工吹玻璃、揼石仔，幫補家計。1958 年結婚，做過工廠，當過小販，養大幾個仔女，沒想過晚年淒涼，弟妹也不相往來，「你捱冇所謂，都有個價值，連價值都冇埋，連尊嚴都冇埋，你何來去做人？」

「梁振英冇忽做得掂」

回歸逾15年，郭嬌說生活越來越艱苦，三屆特首，她指董建華算是關顧長者，曾蔭權則成事不足，但更嬲梁振英，「佢自己僭建嗰啲都唔好啦」。所以被激暈？ 「都有部份啦，睇見佢就嬲」。她最希望增加綜援金，但不存厚望，「最多畀多幾百蚊你，唔會畀得多，你唔好諗得咁天真啦，梁振英冇忽做得掂」。