稱擬選村代表惹不滿 陳金華反擊：忤逆仔想我死

https://hk.news.appledaily.com/local/daily/article/20181001/20511981

稱擬選村代表惹不滿　
陳金華反擊：忤逆仔想我死


陳金華昨在坪洋村祠堂向祖先交代父子恩怨時一度痛哭。張 軍攝

【《蘋果》獨家專訪】
【本報訊】打鼓嶺坪洋村鄉紳陳金華前日登報，宣佈與長子、打鼓嶺鄉事委員會主席兼坪洋村村長陳崇輝斷絕父子關係，對方隨即反駁，更直斥父親當年拋妻棄子。事隔一日，陳金華接受《蘋果》獨家專訪，開腔反斥兒子「忤逆、大話連篇」，大爆兒子因不滿他有意重出江湖參加明年村代表選舉，而從中作梗，終令他忍無可忍登聲明，又稱除非兒子認錯，否則難再續父子情。

「我陳金華正式向祖先交代，與不肖子陳崇輝脫離父子關係，希望佢痛改前非，做番好人！」近年兩次中風、今年8月初剛換腎的71歲陳金華，前日花費過百萬元於報章頭版登聲明斷絕父子關係，他昨日在坪洋村祠堂向祖先交代事件時，不禁痛哭起來。

「佢搵人恐嚇我」


陳崇輝

陳金華表示，近年有村民不滿陳崇輝未有協助解決困難，遂考慮重出江湖，但消息傳到對方耳邊，「佢搵人警告我，恐嚇我，叫我唔好選，令我覺得好痛心」。他斥兒子忤逆，「𠵱家一聲老竇都唔嗌」，又指在2015和2016年兩次中風入院，但對方從未致電關心。陳金華更聲稱今年中養和醫院安排他往廣州換腎，「但佢唔肯簽名，其他仔女全部去晒美國，好彩搵到我個妹簽，佢根本就想我死」。

陳崇輝一直稱與父親多年未有聯絡，但去年底父親闖入母親家要脅取錢，更出手打人。陳金華道出另一版本：「我邊有打佢（前妻），我當時只係返屋企。我喺坪洋村有5、6個單位，又有大批農地，身家都使唔晒，佢（兒子）講大話作古仔。」他反指兒子後來趁其卧病期間向法庭申請禁制令，禁止他踏足該單位，令他心痛。他指30年前與前妻離婚，至2008年才跟當時28歲的太太再婚，多年來一直深港兩邊走，稱自己一直盡父親責任，供養兒子14歲赴英由中學讀至碩士，反而兒子返港後經常向他索錢。

陳金華指2007年兒子當選鄉委會主席前，一家關係良好，兒子2013年結婚亦由他擔任主婚人，「我哋客家人以大仔為榮，如果關係唔好，我點會搵佢做村長、鄉委會主席呀？」但他稱約5年前雙方關係開始轉差，「我喺英國成立嘅博彩公司，原本有6份，包括我、佢（兒子）、前妻、我兩位妹妹同一位細佬，但佢逐一除名，又同我妹妹講將來賺錢冇你哋份，蝕錢就有份，等我哋放棄股份」。

父子關係幾近決裂，陳金華說：「我冇做錯，如果我有對佢唔住，會正式斟茶道歉，如果佢唔啱，希望佢兩仔一女都咁樣對佢，但係我仍希望佢出人頭地，呢個係從來冇變嘅。」陳崇輝昨日則向《蘋果》稱，登報事件是為打擊他而逼媽媽就範。

有報道指父子決裂是關乎感情及生意糾紛，當中牽涉20萬呎的農地買賣，陳崇輝矢口否認，「我完全冇喺新界有任何嘅地產生意」，又稱其他事宜不再回應。
■記者郭美華、黃學潤、張 軍

https://hk.news.appledaily.com/local/daily/article/20181001/20511990

妻指陳崇輝從未探望夫


面對兒子陳崇輝的指控，陳金華怒斥「大話連篇」。

【本報訊】陳崇輝一直指摘父親陳金華要和他斷絕關係，目的是向其母（陳金華前妻）施壓苛索金錢，更有人暗指陳金華現任姓胡妻子牽涉其中，但胡昨接受《蘋果》訪問時強烈否認，並稱直至陳金華的「斷絕父子關係」聲明見報當日，她才得悉事件，又指自己一直專心相夫教子，不了解丈夫與陳崇輝的爭拗，但力挺陳金華是好老公，為人負責任，「我先生唔可能逼前妻交財產，可能佢想攞返自己啲嘢，但唔可能攞前妻啲財產！」

胡形容自己是個「簡單嘅人」，並指自己從未介入別人婚姻，「我聽講好多嘢怪埋我身上，但我冇計較，好多嘢大家心中有數！」她稱丈夫1988年已離婚，兩人在2002年經朋友介紹下才認識，及後在港結婚並育有一子，現年10歲，現時她深港兩邊居住。陳金華近年曾兩次中風，身體大不如前，胡稱陳崇輝從未探望丈夫，令其感到「非常之心痛」，又稱曾勸丈夫不要過份勞氣，「畢竟係個仔，唔好咁樣」。

陳金華表妹：唔知點化解

陳金華移居英國37年的表妹羅村娥，目睹他們父子關係由好轉差，大嘆兩人均待她如至親，但卻無從介入，「我都唔知點化解」。現年58歲的羅村娥稱自幼在坪洋村長大，1981年移居英國，表哥陳金華其後到英國做生意，兩人關係親如兄妹。她指表哥重情義，當年既供養母親，又送子女到英國讀書，最痛錫的便是長子陳崇輝，更以財力支持其英國的博彩公司及踏入香港政界。

羅稱今次事件令曾中風的表哥甚為神傷，她曾致電陳金華次女陳月明查問，但對方指：「唔好理咁多，你都唔知我哋咁多嘢！」
■記者李晟謙、莫家文