四萬個植物標本全都是植物學家的心血。李賢祉心繫植物學，但走出象牙塔，也能為自己的人生下半場種出如茵綠草。
大球場爛草地風波，各大小傳媒，都找李賢祉評點。
他是香港罕有的草皮專家。沙田馬場、新加坡馬場的綠茵賽道，由他一手鋪成；新機場、中國第一個高爾夫球場，都找他做顧問。
但其實，他是植物學博士。早於七十年代，已與冬青之母胡秀英在哈佛共事。
為追溯植物一萬年來的進化，跑到亞馬遜森林，與毒蛇為伴，採集植物標本。
「唔好睇小一條草，唔係就好似康文署，鬧個國際大笑話」。由宏大的植物進化，到微小的拔草除蟲，走出象牙塔，風中勁草，一樣發光發熱。
記者：呂麗嬋
攝影：梁志永、朱永倫
部份圖片由李賢祉提供
這 陣子，中大生物系榮譽高級研究員李賢祉忙得不可開交。上周三，由他權充召集人的「大球場草地專家小組」，就召開首次會議，「我哋唔希望件事過咗就算，康文 署係時候要改革。你睇晒草灣球場，一個月踢七十場波，草地仲係好靚，就知今次笑話，係源於官僚作風；康文署仲話逐步將轄下球場，由天然草轉晒人造草，除咗 方便管理，真係諗唔到其他理由！」講起康文署，一直彬彬有禮的李賢祉，即時「扯火」。
也難怪他氣上心頭，已屆古稀的李賢祉，是公認草皮博 士。草地，從來是他的命根。「做麵包嘅小麥係草，中國人食嘅稻米，都係草，你話緊唔緊要先？」中國以農立國，上世紀的中國學術菁英，都以投身農科，求學報 國為榮。五十年代的大陸，深受蘇聯影響，蘇聯有位農業家叫米丘林，將桃駁到李去種，又將北方的農作物，移到南方培育。小學時寫《我的志願》，李賢祉就寫下 要做「中國米丘林」的宏願！
可惜，生於動盪年代，他的米丘林未做成，已要走難。「爸爸係蔣介石嘅學生，中央政治大學首屆畢業生，真正嘅天 子門生。」成王敗寇，顯赫身份，一夜間，成為負資產。四九年中共上台，李爸爸是最後一批坐軍機，撤離大陸的國民黨將領。「嗰時，喺調景嶺掘地開路嗰個，膊 頭隨時都有幾粒星。」避走香港的李爸爸，流落洗衣店工作，定時寄一百幾十回廣州。
望着中大實驗室種植的溫室稻米，他反問：「中國人食嘅米，都係草，你話緊唔緊要？」
由宏大的植物進化，到微小的拔草除蟲，李賢祉的實驗室在原始森林也在小草地上。
深入南美採標本
很 早的時候，李賢祉已學識馬死落地行的庶民鬥志。五七年，李賢祉與母親、兩姐及一弟，先後來港，「我哋背景敏感，一直未批，後來內地實行『除三害』（麻雀、 老鼠和蒼蠅），全民打麻雀，我嗰時仲係細路仔，誤中流彈，傷及額頭，差啲冇命。」受重傷，引起對荒謬政策的質疑，維穩之下，他與媽媽獲批來港醫病。一場浩 劫，竟成就一家團聚，成為他的人生祝福！
「有好多嘢，回頭諗，真係奇妙。五、六十年代，人人生活艱難，我哋嚟香港嗰陣，爸爸已覓得教職， 生活改善咗少少，住喺跑馬地一間僭建嘅鋅鐵屋，物質唔充裕，但好快樂。」時年十四的李賢祉，在港插班讀中三，他最記得返學第一天，就被老師「問話」：「李 賢祉！你做乜唔着襪？」這個「鄉下仔」忍不住反問：「乜着鞋要着襪㗎咩？」心諗：「喺大陸，朝早大班人做早操，連鞋都冇得着……」
由赤腳 到着鞋唔着襪，他的人生，也在進化。「我哋屋企係客家人，相信讀書可以改變命運」，六二年，順利考入中大生物系，當年的新亞書院，校舍還在土瓜灣。在中學 教了兩年生物，他就心思思出國讀書。「教書收入好好，但我嗰時嘅心態係：喺中學教書，升到盡都係做校長……自恃後生，好想出去闖吓，結果係點你未必會知， 起碼叫做試過走出去，睇吓呢個世界。」
家中經濟依然捉襟見肘，成績超班的李賢祉，外國名牌大學都向他招手，結果，他選了入讀加州大學聖克 魯茲分校，理由很簡單：「揀呢間，係因為佢哋津貼晒我全部學費同生活費」。因緣際會，那時，指導他論文的教授，是專研豆科植物進化的國際權威，主修冷門植 物學的他，最熟植物分類，順理成章，被派往中、南美洲找標本，挖千年琥珀，成為研究團隊入面唯一的華人。
86年英女皇親身來港主持「女皇盃」，要求與參與興建馬場的李賢祉（右）會面。
96年獲邀參建新加坡馬場，協助興建跑道。
「機 會難得，冇諗過危唔危險，心口掛個勇字，臨行前，要打黃疸症防疫針，發冷發燒，好辛苦。」六十年代末的南美洲，仍是人迹罕見的不毛之地。架着眼鏡、像個文 弱書生的他，變身奪寶奇兵的夏里遜福，走進原始森林，一待，就九個月，「跑遍巴西、委內瑞拉、墨西哥、玻利維亞和秘魯，由熱帶雨林走到沙漠。」那年，他才 二十五歲。在學術殿堂，誤打誤撞，行出康莊的第一步。
「個研究中心建喺叢林，離地十幾呎，我一去到，已見屋下面有三隻死狗，都係俾毒蛇咬 死……要出去，隨身要帶五支血清，一俾毒蛇咬到，就自己打入體內自救。啲水全部要消毒，?家啲人話飲水有氯氣對身體唔好，嗰時我哋個個喺樽水放幾粒氯丸， 一打開，就有一陣煙霧飛出嚟。」在美國的七年間，他合共發表了十二篇論文，刊於國際期刊。那些年，成績驕人。
躊躇滿志，在哈佛完成後博士 研究，一九七五年，卻碰上美國石油禁運，百業蕭條，全球削教職，帶着太太和一歲的兒子回流香港，港府宣佈削百分之十四大學教育經費，生物系首當其衝。寒窗 苦讀多年，走進死胡同，「打開報紙，我讀嗰科，相關職位有三份：一份嘉道理農場，一份喺太古城做園林經理，一份喺粉嶺高爾夫球會做Head Greens Keeper。」
「前兩份大致知做咩，最後一份反而唔清楚，心諗不如就試吓。」所謂Greens Keeper，其實是英國傳統的叫法，即是草皮護理員，日常工作就是種種草、除除蟲，為工人編更，當然毋須請讀植物進化的博士去做，「嗰時應徵，唔敢話自 己有博士學位，怕人哋唔敢請。」走出象牙塔，現實逼人，無暇悲秋，已要投入新生活，「嗰時仲住緊北角村，每朝早坐六點鐘頭班船去紅磡，再轉頭班火車到上 水，之後仲要轉程小巴，先可以趕到八點前返到球場。」
跑道成為實驗室
年輕時主修冷門的植物學，為追溯植物進化，李賢祉走進南美洲原始森林，採集植物標本。
由 零開始，他想起老父由國民黨將領，走到洗衣店工作的心情。一咬牙，頭也不回。「要養妻活兒，冇辦法」。興趣，在他眼中，反而可以培養：「十年寒窗苦讀，點 會冇感慨？但緬懷過去冇意思，不如面對現實。喺哈佛做研究生，都要輪流喺亞特諾植物園當值，對園林管理叫做有啲認識，況且，我向嚟鍾意花花草草，只係轉咗 個地點，邊學邊做。」
人生的際遇，總是出人意表。部份高爾夫球會會員，亦是馬會董事，七六年，賽馬會向政府成功申請興建沙田新馬場，計劃 興建一條世界一流跑道。在球會工作僅一年，有人推薦他，高薪挖角。「?家回想，佢哋喺高爾夫球場，原來一直都有留意我嘅工作。」摸着石頭過河，怎想到，竟 成就了一片新天？
「以前純科學研究，離開校園，就係科學與實踐結合。」高爾夫球對草地的要求，必須平滑，球以直線向前滾動，果嶺上的草地，更只有 四至五毫米，平滑如絲；馬場的跑道，草長則達七十至八十毫米，足以承受馬匹千磅以上的體重；就是草的品種，也要嚴選，「先建實驗跑道，試種七類草，睇吓邊 種最適合。」尋尋覓覓，他的實驗室猶在，只是由哈佛、由亞馬遜，轉到綠草如茵的跑道。未到終點，未知勝負。
「命運也許不能自決，但我相 信，路係要自己行出嚟，唔好咁快認輸。」四季的差異、頻繁的賽程，無損一片綠。新加坡馬會邀請李賢祉過檔，大型基建落成，機會接踵而來。「三、四年前，有 個科大生物系畢業生自殺，覺得讀咗咁多書，要賣電話為業，鬱鬱寡歡……之後我返過去中大，同我啲學弟講，讀嗰科，有時唔一定要做嗰科嘅嘢，我，就係一個最 好嘅例子。」
人生的下半場，他種出如茵綠草，也種出了事業出路。「唔好睇小一條草，生命力，隨時強過好多人。」風中勁草，誰說不是？
http://hk.apple.nextmedia.com/news/art/20130825/18393960
難忘冬青之母扶持
在哈佛共事兩年，成就他與「冬青之母」胡秀英（左二）成為世交。
【緣結哈佛】
「冬 青之母」胡秀英，是國際知名的植物學家，去年以一百零二歲高齡仙遊，被指為學術界的重大損失。當年在哈佛共事的兩年，成就二人一段四十年的情緣，她見證他 的兒女出生，二人成為世交。早已半退休的李賢祉，是即將落成的「胡秀英植物標本館」籌委會成員，為籌募經費四出奔走，「佢從冇正式教過我，但我一直以佢嘅 私塾弟子自居，喺逆境之中，佢嘅扶持，永誌難忘」。從前的人與事，總細水長流。
標本館將落成
在大世界走上一圈，李賢祉又回到中大，在恩師胡秀英教授的工作室做研究。
「Dr. Wu到九十歲仲到處去採藥，永不言退，佢工作室入面四萬個標本，都係佢嘅心血。」當年返港，胡在他最失意時，主動要求向嘉道理基金申請撥款，出版香港植物 誌。「佢想助我發展所學，申請最後冇批到，但呢份心意，咁多年嚟，我從冇忘記。」當年的植物誌失諸交臂，今日的標本館，興建工程卻如火如荼。四十年之約， 到底實現了。
沒有留言:
張貼留言