失聰女兒李菁（箭嘴示）死後四年，李光興一家再無父親節。
蕭逸居攝
【本報訊】「冇咗阿菁，父親節已經冇意義！」61歲小販李光興四年來，仍無法接受失聰女兒跳樓自殺的事實，去年更患上抑鬱症，差點踏上愛女的不歸路。今天他突然開竅，不再沉默，趁父親節前夕，於今明兩天在旺角街頭示威，高呼「曾蔭權下台」，為聽障人士謀福利。
「自從阿菁唔響度，全家都唔慣！」李光興將銀色小相架握在手心向，望着相中的二女李菁哽咽着：「我唔想將相片放大，唔想兩個女諗起……」事實上，是全家人為了不觸碰父親的傷口，「阿菁」的名字頓成全家禁忌，還有個多星期的父親節，一家人更不敢提起。
08年3月，當時在中大任助教的26歲李菁，突然在愛民邨22樓一躍而下，父親一直怪責自己。阿菁兩歲時在大陸患感冒，因醫生配錯藥，令她從此失聰，但她反而更勤奮，會考以五優二良的佳績留學美國，又贏得多個國際象棋獎項。
想不到女兒當年在嶺大畢業後，寄出二百封求識信也得不到回應，其間受盡冷言冷語，連麥當奴也拒絕她，不受社會認同令李菁患上抑鬱症，更選擇輕生。李父自責說：「佢沮喪時，我只可以叫佢『唔好放棄』，做老竇乜都做唔到。」
愛 女離開後，李光興天天寫網誌給女兒，更一直將女兒生前用的手機帶在身邊，看看她拍的照片、跟朋友傳過的訊息，「李菁好嗲我，由細到大都黐住我」。父女又一 起在旺角擺檔，售賣他最引以為傲的發明「兒童降落傘」，「有一次佢堅持自己擺檔，講唔到嘢，最後一個都賣唔出，返嚟仲口硬話『我掛住睇書之嘛』」，女兒內 斂倔強的性格，卻讓她走上絕路。
創辦「龍耳」助聽障人士
李光興憶女成病， 四年間經常失眠，去年患上抑鬱症，曾經同樣在愛民邨走廊徘徊三小時，幸而最後被勸服。他四年前創辦「龍耳」協助聽障人士，最近「貪曾」的醜聞令他氣忿， 「如果佢將貪返嚟嘅小便宜，用嚟幫聽障人士，會有好多人受惠」，遂於今明兩天在旺角行人專用區，呼籲市民向曾蔭權的紙板吐口水，促請他下台。
沒有留言:
張貼留言